Jardunaldiak eta albisteak

Itsas energia

Energia-potentzial berriztagarri handia dauka itsasoak. Olatu, marea eta korronteen bidez adierazten da bereziki itsas energia hori, eta ur-azalaren eta itsas hondoaren tenperatura-aldean.

Olatuak eragiten ditu haizeak itsasoan, energia-helburuekin aprobetxagarriak direnak. Zenbait “olatu-bihurgailu” garatu dira, flotatzaileak zein kostara edo itsas hondora ainguratutakoak, heldutasun- eta errendimendu-maila desberdinekin guztiak ere.

Edozein kasutan ere, ikerketak aurrera egiten ari dira eta garrantzi handia ari da hartzen itsasoaren energia Europa osoan, beharrezko garapen energetikoarekin jarraitzea ahalbidetzen baitu, ingurunearekin modu jasangarri eta atseginean betiere. Euskadik potentzial ertain-handia du olatuen energia aprobetxatzeko. Horretarako, Europa osoan erreferentziazkoak diren ikerketa-instalazioak dauzka: Mutrikuko olatuen energia-planta eta BiMEP itsas zabalean dispositibo energetiko flotatzaileak probatzeko instalazioa.

ITSAS ENERGIA MOTAK

Itsasoaren energia gatz-gradientearen, gradiente termiko ozeanikoaren, mareen, korronteen eta olatuen bidez adierazten da.

OLATUEN EDO UHINEN ENERGIA

Olatu edo uhinen energia haizeak itsasoaren azaleran duen eraginez sortzen da. Kantauri itsasoak, batez beste hiru metroko olatuak eragiten dituzten haizeekin, energia-potentzial handia du Euskadin.

MAREEN ETA KORRONTEEN ENERGIA

Marea eta korronteen energiak itsasgoraren eta itsasbeheraren artean sortutako ur masak eta korronteak aprobetxatzen ditu. Marea-tarte handiak edo korronte indartsuak behar dira teknika horiek aplikagarriak izan daitezen.

ENERGIA TERMIKO OZEANIKOA

Energia termiko ozeanikoa itsasoaren azalaren eta itsas hondoen arteko tenperaturaren aldeak eragiten du. Sakonera handiko eta urte osoa eguzki-intzidentzia handia duten itsasoetan soilik aplika daiteke teknika hau.

GATZ-GRADIENTEKO ENERGIA

Ur masen arteko gazitasun-aldearengatik gertatzen da gatz-gradientearen ondorioz aprobetxa daitekeen energia. Estuario handietan gertatzen da normalean hori.