MOVES III 2024ko uztailaren 31 arte eska daiteke
- Euskadik ebazpen-epeen buruan dago hilabete bateko batazbesteko epearekin, eta jasotako eskaeren %94 baino gehiago ebatzi dira dagoeneko, 36 milioi euro baino gehiagoko diru-laguntzarekin.
- Laguntzak motorizazio elektrikoko ibilgailuak, hibrido entxufagarriak eta erregai-pilakoak erosteko dira. Baita karga-puntu berriak instalatzeko ere.
Atzo Euskal Herriko Agintaritzaren Aldizkarian argitaratutako ebazpenaren arabera, ibilgailu elektrikoak erosteko MOVES III laguntzak eskatzeko epea luzatu egingo da 2024ko uztailaren 31ra arte. Energiaren Euskal Erakundeak kudeatuta, orain arte 10.044 diru-laguntza eskaera jaso dira, eta horietatik %94,4 ebatzi dira, 36 milioi euro baino gehiagoko diru-laguntzarekin.
Errekuntza-motorraren ordezko ibilgailuak erosteko laguntza, batez ere ibilgailu elektrikoak eta erregai-pilakoak, MOVES III izenekoa, Euskadiko automobil-parkea aldatzeko bultzada handia da. Laguntza-programa horrek 41,7 milioi euroko aurrekontua du, mugikortasuna aldatzen laguntzeko eta ibilgailu eraginkorragoak eta jasangarriagoak, hala nola elektrikoak, erosten laguntzeko.
Guztira, 10.044 eskaera jaso dira, eta horien espedienteak %94,4an aztertu eta ebatzi dira, 36 milioi eurotik gorako diru-laguntza esleituarekin. Energiaren Euskal Erakundean eskaera jasotzen denetik eskatzaileak ebazpena jaso arteko kudeaketa-denbora hilabete ingurukoa da. Bi alderdi horiek (bolumena eta ebazpen-denbora) erreferentzia dira estatu mailan. EEEk ingurumen-, ekonomia- eta gizarte-printzipioetan oinarritutako mugikortasun-eredurantz aurrera egiteko konpromisoari eusten dio. Era berean, mugikortasun elektrikoaren euskal estrategia berriak eragin handia du balio erantsian, enpleguan, enpresen lehiakortasunean eta berrikuntzan.
| |
Espedienteak guztira |
Laguntza ebatzia € |
| Ibilgailuak |
5.588 |
20.542.860 |
| Kargatzeko azpiegitura |
4.456 |
15.828.359 |
| Guztira |
10.044 |
36.371.219 |
Laguntzen zenbatekoa
Eskatzaileak jaso dezakeen laguntza aldatu egiten da partikularren edo enpresen kasuan, eta txatar bihurtzea nahitaezkoa ez den arren, laguntza handiagoa jasotzen du. Adibidez, partikular edo autonomo batek 4.500 €-ko laguntza jaso ahal izango du ibilgailu elektriko bat erosteagatik, eta 7.000 €-raino igoko da ibilgailu zaharra txatarratzen badu. Enpresek laguntza desberdinak dituzte haien tamainaren arabera, eta txatar bihurtuz gero, hornidura ere handituko da. Gainera, 5.000 biztanletik beherako udalerrietan bizi diren pertsonetzat edo mugikortasun murriztua dutenentzat ezarritako zenbatekoak %10 handitzea aurreikusten du Moves III.ak bere oinarrietan (hau da, 7.700 €-raino).
Laguntza jaso dezaketen ibilgailuak ibilgailu elektriko entxufagarrien eta erregai-pilen kategorietakoak dira. Horien artean, turismoak (M1), furgoneta arinak (N1), koadriziklo arinak (L6e) eta astunak (L7e), eta 3 kW-eko edo hortik gorako potentzia duten motor elektrikoak. Bederatzi hilabete arteko antzinatasuna duten frogapenerako ibilgailu elektrikoak ere diruz laguntzen dira.
Halaber, 5.000 biztanletik beherako udalerrietan kokatuta egonez gero, kostu hautagarriaren% 80rainoko laguntza jaso ahal izango du kargatzeko puntuak instalatzeko, sarbide publiko zein pribatukoak.
Eskaerak egiteko epea 2021eko irailean ireki zen, eta 2024ko uztailaren 31ra arte egongo da indarrean.