• Ficoba erakustazokan izango da, ekainaren 6tik 8ra

Energiaren Euskal Erakundeak stand bat jarri du berriro Bioterra azokan. Bertan, Eusko Jaurlaritzak energia berriztagarrien alde egindako apustua erakutsiko du asteburu osoan, Trantsizio Energetikoan aurrera egiteko eta ekonomia eta energia-kontsumoak deskarbonizatzeko tresna gisa. Inaugurazioan, Irantzu Allende Trantsizio Energetikoko sailburuordeak hartu du parte, eta hau nabarmendu du: “Klima-erronkaren aurrean, Eusko Jaurlaritzatik apustu egiten dugu herritarrak kontzientziatzearen alde, energia aurrezteko eta iturri berriztagarrietatik sortzeko, bai eta etxean, mugikortasunean, aisialdian edo gure kontsumoan ohitura jasangarriagoak txertatzeko ere”.

Energia garbiak sustatzeko neurrien barruan, autokontsumorako energia berriztagarria (elektrikoa zein termikoa) ekoizteko sistemak ezartzera bideratutako laguntzak daude. Herritarrek lehen eskuko informazioa eskuratu ahal izango dute laguntza horiei buruz. Laguntza horiek 80 milioi euroko zuzkidura dute datozen bi urteetarako, eta energia ekoizteko eta kontsumitzeko moduaren paradigma aldatzea sustatzen dute, kontsumitzaileak ere behar duten energiaren ekoizleak baitira, sistema berriztagarri propioen bidez.

“Energia aurrezteaz eta iturri berriztagarrietatik sortzeaz hitz egiten dugu, baita etxean, mugikortasunean, aisialdian edo gure kontsumoan ohitura jasangarriagoak txertatzeaz ere. Karpa tematiko, jolas eta dinamika desberdinei esker, KLIMA Azokak gure eguneroko ohiturei buruz hausnartzera eta gizarte jasangarriago baterantz aurrera egiteko ekintza txikiekin konprometitzera gonbidatzen gaitu. Gainera, lehen eskuko informazioa emango diegu herritarrei gure etxeetan energia berriztagarria sortzeko sistemak ezartzeko edo ibilgailuak eraginkorragoak eta gutxiago kutsatzen dutenak ordezkatzeko Eusko Jaurlaritzak dituen laguntza-programa guztiei buruz”, amaitu du Allendek.

Laguntza horiek guztiak DESKARBONIZAren barruan sartzen dira. Eusko Jaurlaritzako Industria Sailaren erakunde arteko lankidetza-plana da DESKARBONIZA, eta euskal ekonomia osoa, ekoizpen-prozesuak eta energia-sistema deskarbonizatzea du helburu.

Duela bi hamarkada baino gehiago sortu zenetik, Bioterra ezinbesteko hitzordu bihurtu da garapen iraunkorrarekin kontzientziatuta dauden profesional eta partikularrentzat. Dagoeneko finkatuta dagoen foroa da, eta 200.000 pertsona baino gehiago igaro dira Bioterratik 2004an lehen aldiz egin zenetik. 2025 honetan, 115 enpresa erakusketarik baino gehiagok mota guztietako produktu eta zerbitzu ekologikoak aurkeztuko dituzte, hala nola elikadura organikoa, energia berriztagarriak, kosmetika naturala, moda jasangarria, bioeraikuntza eta kontsumo arduratsua.