Geotermia eta aerotermia klimatizazio efizienterako
Bero-ponpak etxebizitzak eta eraikinak modu efiziente, jasangarri eta ekonomikoan klimatizatzeko aukera ematen duten sistemak dira, iturri berriztagarriak baliatuz, hala nola airea (aerotermia) eta lurpeko beroa (geotermia).
Zer da bero-ponpa bat?
Bero-ponpa bat ingurune batetik (airetik edo lurretik) energia termikoa (beroa) ateratzeko eta eraikin baten barrura eramateko gai den gailu bat da, berokuntza, hozketa eta ur bero sanitarioa hornitzeko. Galdara tradizionalen alternatiba moderno eta ekologikoa da.
Aerotermia: airearen energia aprobetxatuz
Nola funtzionatzen du?
Aire-urezko bero-ponpa bat erabiltzen du kanpoko airetik energia termikoa ateratzeko, baita egun hotzetan ere. Sistemak eraikinaren barnera eramaten du bero hori, berokuntzan, hozketan eta ur bero sanitarioan erabiltzeko.
Abantaila nagusiak:
- • Energia berriztagarri eta garbia: airea erabiltzen du energia-iturritzat, eta CO₂ emisioak murrizten dira.
- • Efizientzia handia: kontsumitutako elektrizitate kW bakoitzeko, energia termikoko 2 eta 3 kW artean sor ditzake, kanpoko tenperaturaren arabera.
- • Klimatizazio integrala: sistema bakarrak eman dezake berokuntza, hozketa eta ur bero sanitarioa.
- • Instalazio malgua: familia bakarreko etxebizitzetara, pisuetara eta bulego-eraikinetara egokitzen da.
- • Mantentze-lan urria eta bizitza erabilgarri luzea.
- • Segurtasuna eta osasuna: errekuntzarik eta erregai-depositurik gabe.
- • Bateragarria beste energia berriztagarri batzuekin.
Non erabiltzen da?
Ezin hobea etxebizitza berrietarako, birgaituetarako eta auzokideen erkidegoetarako. Gero eta etxe eta enpresa gehiagok egiten dute teknologia horren alde.
Geotermia: lurraren beroa aprobetxatuz
Nola funtzionatzen du?
Lurraren azaleraren azpian dagoen bero konstantea erabiltzen du (10 metroko sakoneratik aurrera), lurperatutako ur-zirkuitu baten bitartez. Sistemak lurreko beroa hartzen du eta eraikinera eramaten du bero-ponpa baten bitartez.
Abantaila nagusiak:
- • Energia berriztagarria eta garbia: erregai fosilekiko mendekotasuna eta CO₂ emisioak murrizten ditu.
- • Efizientzia handia: kontsumitutako elektrizitate kW bakoitzeko, energia termikoaren 4 kW baino gehiago lortzen dira, lurraren tenperatura egonkorrarekin. Halaber, beharrezkoa den potentzia elektrikoa murrizten da, eta elektrizitate-hargunea txikiagoa da.
- • Sorkuntza-tenperatura: tenperatura altuagoa lortzen da, erresistentzia elektrikorik behar izan gabe.
- • Aurrezpen ekonomikoa: % 70 arte berogailuan eta % 50 arte hozketan, ohiko sistemen aldean.
- • Instalazio iraunkorrak: 50 urtetik gorako bizitza erabilgarria eta mantentze-lan urria.
- • Segurtasuna eta osasuna: ez dago zaratarik, ez dagoelako haizagailurik. Hozgarri-bolumen txikiagoa.
- • Bateragarria beste energia berriztagarri batzuekin.
Non erabiltzen da?
Nagusiki etxebizitzetan, eraikinetan eta prozesu industrial batzuetan. Euskadin, badaude emaitza bikaineko instalazioak.
Konparazioa: geotermia edo aerotermia?
| Ezaugarria | Aerotermia | Geotermia |
| Energia-iturria | Kanpoko airearen energia | Lurpeko beroa |
| Efizientzia | Altua (2-3 kW termiko/kW elektriko) | Oso altua (4 kW termiko/kW elektriko baino gehiago) |
| Instalazioa | Instalazio errazagoa | Zulaketak egin behar dira lursailean |
| Elektrizitatea | Kontratatu beharreko potentzia elektrikoa handitu beharra | Potentzia txikiagoa, efizientziaren arabera |
| Mantentze-lanak | Gutxi, bizitza erabilgarri luzea | Gutxi, bizitza erabilgarria > 50 urte |
| Zarata | Haizagailuek sortutakoa | Zaratarik gabea |
| Hasierako inbertsioa | Txikia, urte gutxitan amortizagarria | Handia, energia-eskariaren arabera amortizagarria |
Halaber, geotermiak ur-zirkuitu bat erabiltzen duenez bilketa-sisteman, teknologia horri esker, prozesu industrialetan edo eraikinak hozteko prozesuetan sortzen diren hondar-beroak aprobetxa daitezke, hala nola Data Centerretakoa.
Zein aukeratu?
Bi teknologiak efizienteak eta jasangarriak dira, eta energiaren kontsumoa eta emisioak murrizten laguntzen dute. Eraikinaren ezaugarrien (energia-eskariaren), lursail erabilgarriaren eta aurrekontuaren arabera egiten da baten ala bestearen aldeko aukera. Nolanahi ere, bero-ponpen aldeko apustua egitea erosotasunaren, energia-aurrezpenaren eta ingurumenaren zaintzaren aldeko apustua egitea da.
