Euskadi aurrera doa deskarbonizazioan, lurraldea energia ozeanikoetan erreferente gisa jartzen duten proiektuekin. Energiaren Euskal Erakundeak I+G, erakustaldia eta industria-transferentzia bultzatzen ditu, azpiegitura berezien bidez eta enpresa eta zentro teknologikoekin elkarlanean.
Horretarako, funtsezko pieza da BiMEP–Biscay Marine Energy Platform, Armintzako (Lemoiz, Bizkaia) kostaldearen parean dagoen itsaso zabalean probak egiteko gunea. Sarerako konexioarekin, tresna ozeanografikoekin eta portutik gertu dauden sarbideekin, azpiegitura horrek aukera ematen du olatuen energia-bihurgailuen prototipoak eta plataforma eoliko flotagarriak probatzeko eta balioztatzeko, 50 eta 90 metro arteko sakoneran, 5 MWeko 4 linea ebakuatzeko ahalmenarekin. BiMEPi esker, garatzaile europarrek ekipoak, kontrol-estrategiak eta mantentze-eragiketak baldintza errealetan probatu ditzakete merkatura azkarrago iristeko.
Era berean, BiMEPek Mutrikuko olatu-plantan jarduten du. Planta hori portuko dikean dago, eta Ur Zutabe Oszilatzailea (OWC) ardatz duen teknologian oinarritua dago. Instalazioak 18,5 kWeko 16 turbina ditu, 296 kWeko potentzia guztira, eta nazioarteko erreferentea da bere jarraitutasun operatiboagatik eta turbinen, sorgailuen eta kontrol-estrategien proba-banku gisa betetzen duen eginkizunagatik. Instalazioak 3 GWh energia baino gehiago isuri du sarera, eta zifra horrek sendotu egin du mundu-mailan duen lidergoa olatu-energiaren sektorearen barruan metatutako ekoizpenean.
Bestalde, Energiaren Euskal Erakundeak parte hartzen du energia ozeanikoen sektorearen garapen teknologikoa sustatzeko zenbait ekimenetan, bereziki olatu-energiaren arlokoetan, euskal kostaldeak duen potentzial energetiko handiari esker. Nabarmentzekoak dira, besteak beste, “EuropeWave” Erosketa Publiko Berritzaileko programa, BiMEPen olatu-energiaren atzemangailuak garatu eta probatzeko; eta “TurboWave” programa, Mutrikuko plantan aire-turbina berritzaileak garatu eta probatzeko. Ekimen horiek finantzaketa propioa eta komunitarioa dute, eta olatu-energiaren balio-katearen garapena sustatzea eta teknologia eta produktua garatzea dute helburu, bai eta offshore ingurunean frogapen esperimentala sustatzea ere, euskal mix energetikoan olatu-energia komertzialki bideragarri egiteko bide gisa.
Jarduera horiekin, Euskadik ekosistema osoa eskaintzen du energia ozeanikoentzat: azpiegitura itsasoan eta kostaldean, eragile aktiboak balio-kate osoan, eta portu- eta industria-ingurune egokia, merkataritza-hedapena bultzatzeko prestatua.
